Hagaskóli

Hagaskóli hlýtur Menningarfána Reykjavíkurborgar

Menningarfáninn er viðurkenning fyrir framúrskarandi menningarstarfsemi á starfsstöðum skóla- og frístundasviðs Reykjavíkurborgar. Hann var veittur í sjötta sinn haustið 2017 og kom þá í hlut Hagaskóla og Dalskóla. Skólarnir tveir fengu þessa viðurkenningu fyrir framúrskarandi menningarstarf með börnum og unglingum og fyrir að hlúa að listkennslu og skapandi starfi. Dagur B. Eggertsson borgarstjóri afhenti fulltrúum skólanna Menningarfánann við líflega athöfn á Kjarvalsstöðum þar sem menningarstofnanir borgarinnar héldu stefnumót og kynntu fræðslustarf sitt á komandi skólaári.

Úr rökstuðningi dómnefndar:

Hagaskóli er fyrsti unglingaskólinn í borginni sem flaggar Menningarfánanum. Í skólanum skipa list- og verkgreinar veigamikinn sess. Allir nemendur hafa víðtækt val og flóru listgreina í sinni stundatöflu. Hagaskóli er í  Evrópusamstarfi um nýbreytni í kennsluaðferðum og tekur þátt í ýmsum þverfaglegum verkefnum sem miða að því að örva listsköpun. Eitt þeirra felur í sér að nemendur skrifa barnasögur sem þeir fara með í leikskóla í Vesturbænum og lesa upp fyrir börnin þar.  Á vorin eru þemadagar þar sem nemendur fá frjálsar hendur til listsköpunar og sýna þeir afraksturinn á uppskeruhátíðinni Listadögum. Þá setur Hagaskóli upp leikverk annað hvert ár þar sem margir unglingar fá að spreyta sig í ólíkum hlutverkum sviðslistarinnar.

Sjá frétt á vef Reykjavíkurborgar

8. september, 2017

0Svör áHagaskóli hlýtur Menningarfána Reykjavíkurborgar"