Nemendum Hagaskóla standa til boða fjölmargar námsleiðir að lokinni útskrift. Á höfuðborgarsvæðinu eru 15 skólar sem bjóða upp á nám á framhaldsskólastigi. Þeir eru allir ólíkir og mikilvægt er fyrir nemendur að kynna sér sérstöðu þeirra og skólabrag vel. Upplýsingavefir skólanna eru góðir og að auki bjóða þeir upp á skólakynningar áður en forinnritun hefst. Við hvetjum alla okkar nemendur til þess að nýta sér þessar kynningar og skoða úrvalið vel.

 

Reglur um lágmarkseinkunnir

Allir þessir skólar setja sér reglur um lágmarkseinkunnir sem nemendur þurfa til þess að komast inn á námsbrautir og eru þær langoftast aðgengilegar á vefjum skólanna. Mikilvægt er að nemendur kynni sér vel þessar reglur í þeim skólum sem á að sækja um.

Nær allir skólar horfa fyrst og fremst á einkunnir í íslensku, stærðfræði og ensku en aðrar námsgreinar geta svo bæst við. Í MR og Versló hafa þessar greinar tvöfalt vægi á við aðrar greinar.

 

Innritunarferlið

Innritun í framhaldsskóla fer fram í gegnum Menntagátt. Nemendur og foreldrar munu fá bréf í pósti með nánari upplýsingum og lykilorði nemenda verður dreift í skólanum.

Við innritun geta nemendur sótt um í tveimur skólum. Í fyrsta val fer sá skóli sem nemendur viilja helst komast í og í annað val þann sem kemur næst á eftir. Nemendur þurfa að velja sér tvær námsbrautir í hvorum skóla og þá er mjög mikilvægt að þekkja inntökuskilyrðin á þeim brautum ásamt því að þekkja eigin stöðu í námi og meta þannig hvort það sé raunhæft að sækja um á viðkomandi námsbraut.

Dagsetningar 2019

  • Forinnritun 8. mars - 13. apríl
  • Lokainnritun 6. maí - 7. júní

Í lokainnritun er mikilvægt að nemendur beri saman einkunnir af vitnisburðarblaði og skráðar einkunnir í Menntagátt. Að lokum er mikilvægt að staðfesta umsóknina því annars telst hún ekki gild.

14. - 16. mars fer fram "Mín framtíð", Íslandsmót iðn- og verkgreina í Laugardalshöll. Samhliða því verður framhaldsskólakynning. Nemendur Hagaskóla munu fjölmenna á þessa kynningu og verða rútuferðir frá skólanum.